呢一年我已經習慣咗返工放工返屋企，甚少出街食嘢，更加唔好講出去做facial，免得就免。自閉喺屋企，訓練到一身氣炸鍋級廚藝，網購嗰陣spot最底價入手，仲有就係自己同自己做facial不求人。今次我就介紹下FOREO UFO 智能面膜護理，瑞士design（中國製），一望個外型就覺得特別靚仔。以下我就同大家開箱，Step by step同大家講解下點樣用，再講下佢值唔值得入手。
嗱，FOREO UFO 唔係啲咩新產品，我見佢上咗架應該有起碼兩年。FOREO 最出名嘅矽膠震震洗面機 LUNA，佢出嗰陣真係癲覆我對「洗面機一定要有毛」呢個想法！不單止可以一邊沖涼一邊用，仲識震，仲要唔發毛～（講講下好似推緊佢哋個洗面機咁添 XD）UFO 係咩嚟？官網中譯「智能面膜護理：結合先進的皮膚護理技術與獨有的韓國面膜配方，是一種奢華又每天都可以使用的面部護理方式。體驗創新之美，瞬間展現健康、有光澤的肌膚。」講白啲，佢係一部導入機。包裝入面有UFO本體（約146.2g）、塑膠透明底座、USB叉電線、一片面膜、一包精華、說明書。
背面係玫瑰金色嘅導入金屬片，圍住佢嘅係有彈性嘅透明矽膠，上面係一個透明嘅塑膠環形扣。機身（粉紅色部分）係矽膠，手感唔錯。UFO共有三隻色：粉紅、瑰紅、粉藍，有興趣可以上官網睇圖。
叉電位。官網話呢部機機身全防水，所以可以用水沖洗，我自己就有啲懷疑如果啲水落咗呢個窿點算...所以我會建議用濕紙巾抹下算，唔駛去到用水沖咁激。
收到貨第一件事梗係叉電先啦，叉電嗰陣會著粉紅色燈，360度咁圍住發光，真係幾靚㗎。
趁叉電機嘅時光，上去app store dowload FOREO個app，set up好就ok。FOREO UFO 智能面膜護理顧名思義，係要配合智能電話（or notepad之類）用。呢度我覺得有少少似太陽能電筒咁，如果冇電話或者冇呢個App，部機都會著嘅，但就唔識郁...
FOREO UFO嘅賣點其中之一係佢哋獨有嘅韓國配方面膜，官網上面有好多唔同功效嘅面膜套裝，大概$10～$16一片，呢個價位我會話唔算貴，但都唔係daily afford得起。
afford唔起？唔驚！入手圓形化妝棉，薄薄地嘅一樣攝得落，浸滿化妝水就一樣good to go～（記得買啲唔會起棉絮嘅化妝棉，我用緊呢隻係萬寧牌）
好，用返FOREO嘅mask先，隨機附送呢隻叫make my day，主要成份係透明質酸：保濕、紅藻萃取：抗氧化。面膜不含令皮膚敏感嘅有害物質，精華多到滿瀉，如圖，係咪好開心好興奮先！
download咗個app，少少set up步驟，再用藍芽pair up電話同部UFO，就可以揀treatment。呢啲嘢大家都識我就唔講咁多喇。唔同嘅面膜有唔同嘅treatment regime，我試過幾款，我覺得其實差唔多。首先係紅色LED + 熱療 --> 紅色LED + 熱療 + 脈衝爭動 --> 綠色LED + 冷療 --> 完成cycle。全個過程90秒搞掂！
90秒真係眨下眼就過，熱療（體感約～30度）好舒服，再加上脈動按摩真心係無敵。冷療（體感~20度）都唔錯，唔係冰感嗰隻（同埋冰感嘅冷凍其實對皮膚嘅血管唔好㗎！）紅&綠LED用嗰陣並唔感受到啲咩，聽講皮膚細胞吸收唔同range嘅顏色係會有效均勻膚色，呢一點老實講我係唔多buy嘅，唔通電視電腦電話mon前面曬係塊面會美白咩？唔會囉...
如之前所講，塊面膜有非常之多精華，咁我就梗係唔執輸client redo treatment再做多90秒落條頸度啦。但我發現原來啲精華一早比我吸晒...所以用同一塊面膜係唔可以做兩次90秒treatment。換句話說，UFO導入功能真心冇得頂或者我皮膚超級乾 （我相信兩者都係真嘅 XD）
比你睇吓，真係吸到乾晒，一滴不剩！灰色一點點嗰啲係我導入條頸嗰陣，頸上面嘅塵同污垢。
精華同面膜袋剩低嘅水有啲相似。我覺得可以搽喺塊面上面，照用UFO直接碌，唔駛一定用化妝棉或者面膜。
用咗一排，係時候分享一下心得同埋值唔值得入手。用UFO導入一塊浸左我平時用開嘅化妝水化妝棉，90秒之後，皮膚嘅手感滑過就咁用手抹好多，皮膚多咗一層光澤，證實佢真係有將化妝水嘅營養快速導入皮膚底層。見到效果咁好，就係我日日keep住院嘅動力喇。個人心水推介：玫瑰mask mode + 綠茶mask mode！好正，碌完呢兩個mode，毛孔收細到回覆廿幾歲咁（笑）
PROs：
外形嚟講，的確係靚過晒所有嘅導入機
即使佢冇手柄，手感都好好
輕身，機仔細細容易收藏、或帶去旅行
只係需要90秒，唔會嫌煩
熱療舒服
冷療好舒服
震動都好舒服
容易清潔
無線，方便用
**重點** 非常有效導入 **重點**
CONs：
導頭範圍大，導入鼻翼、鼻樑、眼周呢啲位唔算方便
一定要同手機一齊用，缺一不可
而手機又一定要dl app，如果手機冇乜位冇乜ram就...
導入機嚟講，價位唔算吸引
LED用途有啲雞肋
指定嘅面膜都算貴（但可以用代替品嘅）
我本身已經擁有某牌導入機，機身好重，熱療同冷療都冇FOREO UFO咁舒服，更加唔識震。但UFO冇導出呢個function對我嚟講係美中不足，導頭亦相對較大，唔可以精準咁導入到鼻翼呢啲毛孔特別粗大嘅位置。講價錢，由於我入手我本身嗰價香港好似冇得賣，得水貨，印象中同UFO差唔多錢（UFO 官方價$2180）UFO同LUNA一樣，有出mini版，所有嘢都差唔多，只係少咗冷療，官方價 $1390，呢個價位就似樣喇。
我覺得，家用美容儀係一個趨勢，無論係唔係因為疫情都好，出面有冇join facial都好，愛錫自己皮膚，每晚臨瞓前都十分之需要me time一下幫自己嘅皮膚叉電，所以點都要入手一部美容儀。但你話買咩牌子好，就睇自己想要啲咩。如果每晚已經攰到震，唔通仲可以慢慢敷mask按面咩！FOREO UFO只係需要90秒，90秒講真唔奢侈啦，一take過做到敷mask導入 + 按摩，繁忙人士可以考慮入手呢部！
FOREO官網：https://www.foreo.com
FB：https://www.facebook.com/FOREO/
IG：https://www.instagram.com/foreo/
**產品/產品資料由品牌提供，真心分享。歡迎電郵查詢。
ngayiellie@gmail.com
http://www.facebook.com/popcornellie
http://instagram.com/popcornellie
http://popcorn-express.tumblr.com
Comments
Post a Comment