過完一個長假期冇晒假去外遊，留喺香港一樣可以嘆返個法式下午茶！見到靚靚嘅花草牆身可能好多人已經估到喺邊度，冇錯喇，就係Hotel ICON 唯港薈大堂餐廳GREEN，而家間法國著名朱古力品牌La Maison du Chocolat合作炮製「La Maison du Chocolat法國風情」下午茶！整個下午茶由前菜，主菜，直到甜品架均以法國食材入饌，啖啖法式滋味，去唔到旅行住？可以嚟呢度想像吓自己身處巴黎。
前菜：香草牛油焗法國蝸牛配炒蛋及魚子醬、法國鵝肝醬釀蟹肉配蒜蓉包、法式焗青口配普羅旺斯、法式忌廉龍蝦湯
酒店菜式賣相一定有返咁上下水準，人未食，相機食先就唔使講。四款前菜均為法國有名嘅菜式，放埋一齊，感覺上係好似好濃味，不過份量唔多，可以每樣都試下確係唔錯。法式忌廉龍蝦湯係我個人心水，濃郁嘅龍蝦甜味由個胃暖到入心。碗邊嘅紅色係模仿巴黎貴婦嘅唇膏印（外國人個咀係大啲嘅。）
主菜之一法式芝士焗加勒比野生龍蝦尾（半隻）配田園沙律。野生龍蝦非常吸引，可以$38加購整條龍蝦尾。啖啖肉，彈牙且鮮甜多汁，五星級美味！
法式紅酒燴牛面頰肉配薯蓉，牛面頰極度嫩滑，可以講得上入口即溶。
雲呢拿忌廉汁伴香煎三文魚柳配鮮茄沙斯，三文魚呈粉紅色，煎得啱啱好。特別之處在於其雲呢拿忌廉汁，確與坊間有別。一問之下，原來以原條雲呢拿支做呢個汁，真係食得出係兩回事！
法式紅酒草飼西冷牛扒配薯蓉（五成熟），牛魔王可以$38加購西冷，重牛味不在話下！不得不提薯蓉極之細滑，又如mousse一樣。
重頭戲一定係呢個巴黎鐵塔三層架，共八款精緻法式甜點，美不勝收，靚到唔捨得食。下面放有一個電動轉盤，有啲迴轉壽司咁嘅感覺（哈哈）今日做半日貴婦，食甜品都唔可以飛象過河嘛。8款甜品我覺得都十分出色，當中最常encore嘅係自家製法式芝士蝴蝶酥，極香芝士味，鹹版蝴蝶酥有驚喜。法國開心果馬卡龍，採用La Maison du Chocolat朱古力優質可可，食落啲確係細滑兼帶開心果香味。紅桑莓忌廉泡芙我都好鍾意，超厚嘅忌廉唔會太甜。最後一定要講吓三層架嘅靈魂scone，牛油味香，當中嘅果醬係自家製嘅士多啤梨荔枝玫瑰，玫瑰味好突出，果甜帶微微花香，好味到食到一滴不剩。
火柴盒咁精緻嘅盒仔入面有兩分朱古力，勁濃郁，朱古力迷表示好滿意。
加$20可以任食自家製法國草莓雪糕，微酸唔過甜，仲有數款topping自己DIY，必加！
下午茶包illy咖啡或TWG茗茶，多款口味，一邊嘆甜品一邊飲返杯真係休閒感滿滿。星期六、日及公眾假期惠顧更可額外獲贈法國氣泡酒乙杯。仲有禮物送返俾你，限量La Maison du Chocolat 朱古力禮盒乙盒，先到先得，送完即止。
=====================================
「La Maison du Chocolat法國風情」下午茶
日期：由2023年4月17日至另行通知
時間：每日下午3時至6時供應
地點︰ 大堂GREEN
價目︰
星期一至五︰每位港幣418元* ; 兩位港幣728元*
星期六、日及公眾假期: 每位港幣$468元*; 每兩位港幣$798元* （每位惠顧賓客可額外獲贈法國氣泡酒乙杯）
查詢或預訂︰ (852) 3400 1300 或 book.restaurant@hotel-icon.com
網上預訂︰https://dining.hotel-icon.com/tc/reservation/?rid=108
了解更多︰https://www.hotel-icon.com/zh-tw/offers/la-maison-du-chocolat-french-afternoon-tea
*價目另設加一服務費
Comments
Post a Comment